RESEP DEUR HELEEN MEYER

Ons is almal lief vir warm koesterkos, en dié geurige sop is altyd ’n wenner. Dis eintlik ’n volledige maaltyd met vleis en groente, en met die aromatiese geure van tamatie, paprika en gemaalde komyn daarby. Maak dit as ’n heerlike gesinsete, of nooi vriende oor vir ’n gesellige winterkuier. Dit gaan ’n nuwe gunsteling word – dit waarborg ek jou!

Lewer 8-10 porsies

Jy benodig
• 30 ml (2 e) olyfolie
• 750 g–1 kg ontbeende stowebeesvleis of -skaapvleis, in blokkies gesny en met die oortollige vet verwyder
• 2 groot uie, eers in kwarte en dan in dun skyfies gesny
• 500 ml (2 k) sterk Rooibostee
• 2 knoffelhuises, gekneus
• 1 rooi soetrissie, ontpit en in dun repies gesny
• 2 selderystingels met blare, in dun skyfies gesny
• 40 ml (8 t) paprika
• 10 ml (2 t) gemaalde komyn
• 2,5 ml (½ t) karwysaad (opsioneel)
• 500 g botterskorsie of 2 middelslag-patats, geskil en in blokkies gesny
• 1 lourierblaar
• 1 x 400 g-blik gekapte tamaties
• 1 liter (4 k) hoender- of groenteaftreksel
• 150 g dun groenboontjies, diagonaal in derdes gesny
• suurlemoensap, sout en varsgemaalde swartpeper na smaak
• 50 ml grofgekapte Italiaanse pietersielie
• 125 ml (½ k) suurroom, ongegeurde jogurt of karringmelk
• Nog Italiaanse pietersielie om mee voor te sit

Jy maak só
1. Verhit ’n bietjie van die olie oor matige temperatuur in ’n groot kastrol.
2. Verbruin ’n kwart van die vleis. Skep dit uit. Herhaal die proses met die orige olie en vleis. Doen dit in sulke sarsies totdat alles verbruin is. Skep uit en hou dit eenkant.
3. Soteer die uie, knoffel, soetrissie en seldery in dieselfde kastrol totdat dit sag is. Voeg die speserye by en soteer dit 2-3 minute lank, tot aromaties.
4. Roer die botterskorsie of patats by en soteer dit ’n paar minute lank.
5. Roer die vleis met die lourierblaar, tamaties, aftreksel en tee by. Bring die mengsel tot kookpunt, verminder die hitte, sit die deksel op en laat prut dit stadig, 1½-2 ure lank, of totdat die groente en vleis sag is. Die sop moenie te vinnig prut nie, want dit kan die vleis laat taai word.
6. Voeg die boontjies tydens die laaste 15 minute van die kooktyd by. Geur na smaak met die suurlemoensap en sout en peper, en roer die gekapte pietersielie by.
7. Sit dit voor met skeppies suurroom, jogurt of karringmelk en die res van die vars Italiaanse pietersielieblare.

Facebooktwitterredditpinterestlinkedinmail